افراد آنلاین
1 کاربر آن‌لاين است (1 کاربر در حال مشاهده‌ی سایت اخبار)

عضو: 0
مهمان: 1

بیشتر...

تۆرکمن صحرادا مدرن شیغریّت بارادا اوُیلانمالار--«ابراهیم بدخشان»

فرستنده magtymghuly در تاريخ ۱۳۹۴/۱۰/۹ ۸:۰۰:۰۰ (438 بار خوانده شده) مقالات
برای دیدن تصویر اصلی در صفحه جدید کلیک کنید.تۆرکمن شیغریّتینده 30 ییلدان غوُوراق واغتینگ ایچینده غازانان تجریبه لریمی چأکلی زاماندا، چاقلانگجا گؤرنۆشـــــده اوُرتــا آتیارین. البتده بو ماقالانـــینگ اولی بؤلـه گی مدرن غوُشغی حاقدا دئر، همده بو گینگ مسئلأنی غیسبی گؤرنۆشده یازماق اۆچین، آنگســــــادئنا باقئپ، کلاسیک غوُشغینینگ تاپاویت لارئنی ساناپ گچمه گی ماقصاد ادیندیم.
بو تئوریانی غفور خوُجا، عبدالقهار صوفی راد و عبداله محمدی داغی نینگ غوُشغولاری بیلن بزأپ دۆشۆندیریش برمأگه چالیشدیم. البتده کأبیر یرلرده اؤز غوُشغولاریمدان هم میثال لار اۆچین حاییرلانماغا مجبور بوُلدوم.
نأمه اۆچین مدرن غوُشغی؟
گیریش حؤکمۆنده بو هیل لی غوُشغولاری نأهیلی آدلاندئرماق بارادا جدل لی رأک بیر گۆررۆنگی اورتا آتایین. سوُنگقی 30-20 ییل لیقدا تۆرکمن صحرادا مؤوج اوروپ باشلان تۆرکمن شیغریّتینگ تولقونینا هایسی آد میناسیب بوُلوپ بیلر؟ یؤرگۆنلی آدلار: تأزه غوُشغی، آق غوُشغی، ارکین غوُشغی، عاصیرداش غوُشغی ...
1- منینگ پیکریم بوُیونچا « تأزه غوُشغی» دییلمه گینگ سبأبی، فارس دیلینده « شعــــر نو» دییلن سؤزۆنگ ترجیمه سی بوُلوپ بیلر، یؤنه دۆنیأ صونغات مکتب لرینده تأزه ـ کؤنه دییلن بؤلۆنیش یوُقدیر. کلاسیک رئالیزم،سوررئالیزم یا-دا امپرسیونیزم، اکسپرسیونیزم، مدرن و شوُنگا منگزش استیل لر یا مکتب لره دوش گلیأریس.
مدرن غوُشغی ادبییات سئراشــــئنا سیغمایار. اوُل صونغاتدیر(هۆنأردیر). پوُازییا، ادیل موسیقی نینگ،نقاشی نینگ،تیاترینگ، پیکـــرتراش لیغینگ صونغات بوُلوشی یالی اینگ گؤزل و کأمیل صونغاتدیر. حاقیقی شیغیر هیچ هاچان کؤنه لیأن دألدیر. دییمک « تأزه غوُشغی» دییلیأن سؤزۆنگ مانی سی بوُلوپ بیلمز.
2- « آق غوُشغی» بو گؤرنۆش هم فرانسالی لارئنگ شیغریّتینده بللی بیر استیل بوُلوپدیر. بیزینگ بو گۆنکی غوُشغی توُلقونیمیزا میناسیپ آد بوُلوپ بیلمز. آق رنگکی، تۆرکمنینگ بوُیادان دوُلی رنگ ـ برنگ غوُشغوسینا آز بوُلار. هم ـ ده بیزده گؤک،غارا، غیزیل غوُشغولار بوُلمانی اۆچین « آق غوُشغی» هم بوُلوپ بیلمز.


3- «ارکین غوُشغی» نأمه دن ارکین؟ نأمه دن آزاد؟ غالیپدان یا قاپیادانمی؟یوُق! مدرن غوُشغینی دینگه غالیپ یا قاپیا اۆیتگه شیک لیگنه پسه لدیپ بیلمریس.اوُندا، کلاسیک غوُشغی بیلن تاپاویتلار حاص گینگ دیر. بو ماقالانینگ دوُوامئندا بو حأصیته گؤز یتیرمک بوُلار.
4- « عاصیرداش» سؤزۆنینگ بللی بیر عومومی مانیسی بار. بیزینگ عاصریمـــــیزدا دۆرلی ـ دۆرلی استیل لرده غوُشغی یازیلیار. اوُلارینگ باریسی عاصیرداش غوُشغولاردیر.عاصیرداش شاهیرلار هم بوُلوپ بیلر، یؤنه عاصیرداش دییلیأن استیل یا مکتب بوُلا بیلمز.[/من بو سبکه مدرن دییه سیم گلیأر. سبأبی 21ـ نجی عاصیردا همّه تاراپلایین یۆزه چئقیان اؤسۆشلر،أهلی زاتلاردا سنّت لر بیلن آرانی آچماغا گلیپ یتیردی. مدرن رمان، مدرن نقّاشی، مدرن موزیک، مدرن دورموش و باشغالار. بو مدرن زاتلار، مدرن یاشاییش بیزی مدرن شیغریّته یاناماغا هم روغصات بردی هم ده مجبور اتدی.
شاهئر غفور خوُجا 23 مرداد 1388ـ یئلدا « اجتماعی حرکت لر، ارکین غوشغئنگ گؤز باشی دیر » آدی بیلن یبلن کلاله شهری نینگ مختومقولی جمغیّتینگ 47 - نجی اوُتورشیغیندا سؤزچی حؤکمۆنده چیقیـــش ادنده، ییگریمینجی عاصیردا تۆرکمن شیـغریّت دۆنیأسی نینگ اؤسۆش پروسه سینی دوُلی و گینگ گؤرنۆشــده نیغتاپ گچیپدی. البتده اوُل گۆن آق غوُشـــــغی آدی بیلن دگرلی میثال لار آرقــــــالی اوُل دؤورۆنگ شیغریّتینده، کلاسیک غوُشغـــودان نأهیلی اۆیتگه مه لر یۆزه چیقیانــــدیغینی آیدینگلاپدی. یؤنه من بو مسئلأ باشغاچا غارایان کریم غوربان نپس لر، غوربان ناظار عزیزلر و باشغالار... تۆرکمن غوُشغوسی نینگ شو گۆنکی تاپقئرنا یتمگنه اولی یاردام بریپ بیلیپ دیرلر. یؤنه اوُلارئنگ غوُشغوسئنا مدرن غوُشغی دییمک بوُلماز. اوُلار کلاسیک بیلن مدرنینگ آراسئندا غورنالان اولی و برک کؤپری دیرلر.
البتده تۆرکمنیستاندا گؤزل شاغولیوُوا ، آتامئراد آتابایوُو یالی لار بیر بادا مدرن غوُشغی غوُشجاق بوُلوپ سئنانشئپ دئرلار، یؤنه باشارماندئرلار.
اوُندا مدرن غوُشغی نأمه قا؟ اوُنونگ تاپاویتلاری اؤنگکی غوُشغولار بیلن نأمه؟ اوُنونگ حأصیت لرینی نأدیپ ساناپ آچئقلاپ بوُلار؟

1- ایزی گیدرلی لیک حأصیتی
مدرن غوُشغینینگ بللی حأصیت لری نینگ بیری، غوُشغی باشلانیندان، غوُتاریانچا مانی تایدان، دویغی تایدان ، خیال و گینگیش لیک تایدان اؤز ایزی گیدرلیگنی ساقلاپ، هر بیر سؤز، هر بیر سطیر و هر بیر بند اؤز دوُوامی بیلن جبیس له شیپ گیدیأر. شوُنونگ اۆچین هم اوُنونگ بیر سطیرینی یا بندینی حتّی بیر سؤزۆنی هم آییرماق بوُلمایار. یؤنه کلاسیک لاردا، هر بیر بند، کأماحال هر بیر سطیر آیری باشغا مانی لارا غوللوق ادیأر، شوُنونگ اۆچین هم بیزینگ باغشی لاریمیز آرقایین ایسلأن بندلرینی کلاسیک بیر غوُشغودان آلیپ آیدیملار دؤره دیپ بیلیأرلر، یؤنه مدرن غوَُشغودا بو ایش مۆمکین دألدیر. میثال:
بير تاراپدان
غوُل اوزاتيار بو دورموش
گلين بارماق سالقئم لارئم اؤپ ديييأر
بير تاراپدان
دیوارداقي ساغات دان
ياساما غوش يايقاپ ـ يايقاپ كلله سين
«اؤت ،اؤت ،اؤت» ديييأر

بيز ايچرده
بير ماشغالا،دؤرت بوُلوپ
غئش بوغاران آينالارئ چئزمايارس
من غوُل چكيأن
ماشغالام يۆزۆك
غئز چكيأر يۆرِك
آ- اوُغلوم بوُلسا
دينگه يازيار:
«چؤرِك ـ چؤرِك ـ چؤرِك»

هوُل بِيله ده غارشئداقي غوُنگشئ دا
بوغاران آينادا
اييأم سۆرچۆپ دير
اؤنگ يازئلان چؤرِك
چِكيلِن يۆرِك

بير تاراپدان غوُل اوزاتيار بو دورموش
«بير اوُوادان غئزا منگزأپ آلدايار»
بيرتاراپدان پلتک ساغادئنگ ديلي
مانگا بير زات
مانگا بير زات سارغايار

اؤتۆپ باريار
يوُرتوپ باريار بو دورموش
غوُل چكمه لي هر گۆنۆنگه ائنانئپ
غوتارنئق لئ مۆتدتي بار كأن زأدئنگ
سن اؤزۆنگه مۆتدت سيز بير غارايئش
دؤرتمأگه چالئش
غوُي مانئ تاپسئن
باشغاچا اؤزگريش
باشغاچا دورموش
( غفور خوُجا/ دورموش )
2- کأمیلل لیک حأصیتی
ایزی گیدرلی لیک حأصیت مدرن غوُشغینی کأمیل لیک حأصیته تاراپ ایتریأر. مدرن غوُشغی جانلی بیر پردمت(En.Predmet) یالی دوُقوزی دۆزودیر. اوُنونگ بار آغضالاری یر ـ به یر و دوُلودیر. اوُنی اۆیتگه دیپ ، آرتدیریپ یا کمه لدیپ بوُلماز ، گؤزی بیلن آغزی نینگ یرینی دگیشدیریپ بوُلماز. الینگ ، آیاغینگ سانی ایلاییق دیر. سؤزلر اؤز اوُرنوندا اوُتوریپ ، اوُلارینگ آقیمی نینگ دوُوامیندا پاتاناقلایان یا پلتکله یأن اله منت گؤرمرسینگ، اگرـ ده غوُشـــغی نینگ بیر یرینده بیر غاراشـیلمایان بۆدره یشه غابات گلایسنگ ، اوُل شیغرینگ عجیزلیگی دألدیرـ ده غایتام اوُنونگ طبیغی آقیمیندا ادیل آقارینگ بیلی نی دیلن آغیر بیر داش یالی غوُشغا گؤزل لیک بریأن صاخنا اؤورۆلیأندیر.میثال:
چئپلاق سؤزلريم
يالانگاچ يالنگئزلئغئمدي.

حأضير ساللانمانقا گۆنۆنگ كيرپيگي،
كۆمۆش دامجالار
بوُزيارقا گينگ كؤلۆنگ دوري غايماغئن،
آسمان بيلن كؤلۆنگ
بيريگن چاغي
ياغتي‏نگ آقئشي
ساليار يادئما
سوُنگقي باقئشئنگ

چئپلاق سؤزلريم
چئپلاق سؤزلريم
يالانگاچ يالنگيزلئغئمدي.

(ابراهیم بدخشان / باقیش )

3ـ یکه ـ تأکلیک حاصیتی
سنتی وکلاسیک دیوانلاردا منگزش غوُشغولار ، منگزش ماضمونلار یا ـ دا منگزش تصویرلر ومنگزتمهلره کأن دوش گلیاریس. اوُلار کؤپلنج گؤزلری «دریا» کیرپیکلری «اوُقا» و غاشـلاری «یای ـ ا» منگزه دیپ دیرلر یا ـ دا گؤس ـ گۆنی آلمان «گؤزلرینده بالیق یوزیبرمهلی» دییپ شوُل بیر منگزه تمأنی باشغاچاراق یازیپ دیرلار. یؤنه مدرن غوُشغی «گؤزلریم گیجهلری یؤره یار» یا «حأضیرساللانمانقا گۆنۆنگ کیرپیگی» دییپ گؤزه ،کیرپیگه تأزه مانیلار و تأزه کاراکترلر بریپ بیلیأن غوُشغیدیر. کلاسیک لاردا ماضمون غایتالانماغینا کؤپ غابات گلیأریس. اؤویت، نصیحاتلی یا واصپی غوُشغی لارینگ تأثیرینی بیر ـ بیرینه غاتیپ هم اوُقاپ بوُلجاق. البته یکه ـ تأک غوُشغولار هم بار یؤنه اوُلارینگ سانی آز بولوپدیر. مدرن غوُشغودا بو مسئله دوُلی باشغاچا؛ بویرده هر بیر غوُشغی بیر آدامجیق یالی اؤزۆنه ماخصوص گؤرنۆگی ، غیلیغی و حرکتی باردیر. باشغا آدامجیقلارا منگزه تمک بوُلماز. مدرن غوُشغینی کوُپی ادیپ بوُلمایار. اوُل کوُپی ادیلسه ـ ده یاساما بوُلیار.
میثال اوچین عبدالله محمدی نینگ بوغوُشغوسینا منگزه دیپ ننه نگ غوُشغی یازیپ بوُلار:

کؤینه حارابادان
یکه جه سۆتۆن
اؤستۆنده بای غوتان
تۆیدۆپ دور اجیرجه سرچأنینگ اتین
غارغا ،
بیلبیل،
توُرغای
تاپاوودی یوُق،
هربیری نینگ گؤزی، گؤزۆنه ایلدیگی
اؤل غارامانگلایینگ اینگ سوُنگقی دمی.
تؤرت تؤوره رگنه غاراپ
تاپارین اؤیدۆپ ینه بیرینی
حأضیر غانلی چۆنگکۆن یره سؤرتۆپ دور
خیتیر
خیتیر
خیتیر
یکه جه سیچان
شوُل چۆیرۆک سۆتۆنینگ کؤکۆن کرتیپ دور

4 ـ دنگ آغراملیلیق حأصیت (بالانس)
بویرده نیغتالجاق بوُلیان بالانس،غوُشغینینگ آغرامیندا دأل ـ ده، اوُنونگ اساسی المنت لری نینگ اؤز آرا دنگ آغراملی لیغی دیر. مدرن غوُشغی نینگ فوُندامنتینی توتیان، اسکلتنی بیرـ بیرینه برک باغلاپ دیکه لدیأن، چپرچیلیگ بیلن بیناسینی غوروپ گؤزل بیر آرشیتکت دؤره دیان نأچه سانی اولی سۆتۆن باردیر. سۆتۆنلرینگ باشی اگر ـ ده دویغی بوُلیان بوُلسا، اؤنگا یاردام بریأن سۆتۆنلر دیل چپرچیلیگی، موسیقی آقیمی، آغرام، ماضمون بایلیغی، تصویراۆیتگه شیک لیگی و باشغالاردان عیباراتدیر. دنگ آغراملی لیق دییمه گیم بو سۆتۆنلر اؤزآرا بالانس بوُلمالی دییدیگم دیر و البتده باری بیر درجهده دنگ بوُلمالی دیمک دأل ـ ده، اوُلارینگ آراسیندا بللی بیر یاغدای لاردا، بالانس(تناسب) بوُلمالی دیر. عبدالقهار صوفی رادینگ «طبیغات ـ آدام» آدلی غوُشغوسیندان بیر پارجا:
اير بيلن ؛
سؤييأنيمي دويدوردئم
پنجيرأمينگ دوُستئ گؤزل بير گۆله
اِليم کۆيزه لي .

غوشلوق ،
يازئنگ کپه لگی، گرشينه غوُندئ
ايكي سيني-م سيپادئ گؤزلريم
شِمال بوُلوپ .

يؤنه آدام لار ،
رأحيمدارلئق كؤچه سي نينگ سوُنگوندا
بير ـ بيرينه بؤگۆريأر !.
يۆره گيمينگ بولوت لارئ
گۆنۆنگ داشئنا کرپ يالئ ياپئشئپدئر
منينگ أديم لريم آقارا ائمتئليار
گيجه يالئ غارالئغي يووماغا .

5 ـ ماضمون بایلیغی ـ مانی بیرلیگی
21ـ ینجی عاصیرینگ آدامی اؤنگکی عاصیرلارا گؤرأ دۆشۆنجه تایدان، سواد تایان اولی تاپاویدا ایه دیر. بو اۆیتگه شیک لیک سوُنگقی40-30 ییل لیقدا عیلیمینگ چأکسیز گینگه مگی، تکنولوژی نینگ بی چاق اؤسۆشی نینگ نتیجه سینده بوُلوپ بیلر. شوُل ساندا 21ـ ینجی عاصیرینگ شاهیرلاری هم بو عاجاییب دؤورۆنگ اؤنگده باریجی و آیدینگ پیکیرلی انسانی حؤکمۆنده، دۆنیا غارایشی گینگ و انسانیّته بوُلان دویغوسی حاص غوُچاقدیر. بو دؤورۆنگ شاهیرلاری اؤنگکی دؤویرلرینگ شاهیرلاریندان اۆیتگه شیک بوُلمالی دیر. شاهیرینگ روحی بایلیغی، گینگ گؤزیتیمی ، جهانی دۆنیا غارایشی بیزینگ شیغریّتیمیزی، یرلی (محلی)، ملی چأکلردن چیقاریپ ، اؤنگا جهانی بیرمانی، ماضمون بریأر. کلاسیک غوُشغی بیر بندینده نأچه سانی باشغا ـ باشغا ماضمونلارا خیذمات ادیأن بوُلسا؛ مدرن غوُشغی باشدان ـ آیاق مانی بیرلیگنی ساقلایاندیر. بودییدیگم مدرن غوُشغی ماضمونا غاریپ دییدیگیم دأل، غایتا ماضمونا بای جاهانیمیز بیزی بای مانیلی صونغاتلارا التیار.
مدرن غوُشغی ماضمون تایدان غاتلاق ـ غاتلاق بوُلیار. اوُنونگ بیرینجی غاتلاغیندا ساداجا بیرتصویر، یا واقا یادا بیر حرکت گؤرۆنیار یؤنه، اؤنی سینگه اوُقاپ گؤرسهنگیز، ایکینجی غاتیندا بیر فیلوسوفیک(فلسفی) یا اجتماعی یا لیرکی(عشقی) ویاـ دا باشغاچاراق مانی آغتارماق بوُلار. غایتالاپ ـ غایتالاپ حاص سینگه رأک اوُقاپ گؤرسهنگیز ولین ، اۆچۆنجی غاتینا یترسینگیز، شوندا شاهیرینگ روحی دۆنیاسی، سیزینگ دورقونگیزا سینگر.

ایزین کسمأن اؤوۆسیار توپان
چایقانیان آغاچلانگ پوداقلاریندا
گزلین
سارایار بیر غوش
اوُواز بیلن بلکی اؤن سؤیگۆلی سین چاغیریار
حاراساتلی آلادا،
یا بلکی
هؤوۆرتگه سین غوُرایار اؤز ایجه جیک قالبیندا
غوُرایار یاـ دا
توتوش بیر باغی
اؤوۆسیار، اؤوۆسیار، اؤوۆسیار توپان
سایرایار
سایرایار
سایرایار دینمان
غوش
باغ
زامان
انسان
(ا. بدخشان / سازلاشیق )

6 ـ مدرن غوُشغینینگ دیلی
تۆرکمن دیلی نینگ شیغریّت تاریخیندا، دیلینگ اؤسۆشی، اۆیتــگهشی همّأمیزه مسه ـ مألیم دیر. حالق دؤره دیجی لیگی نینگ دیلی، بیک پیراغیدان اؤنگکی دؤویرده دؤران غوُشغی لارینگ دیلی. پیراغی نینگ دیلی و اوُنونگ تأثیرنی آلان دؤویردش لرنینگ دیلی. تۆرکمنستاندا20ـ نجی عاصیر شیغریّت و ادبیاتی نینگ دیلی بیرـ بیریندن دوُلی تاپاویت لانیاندیر. هر دؤویرنگ اؤزۆنه ماخصوص دیلی بوُلشی یالی، مدرن غوُشغی نینگ دیلی هم اوُلاردان تاپاویتلی بوُلیار. بو تاپاویت، سؤزلرده، سؤزلرینگ گؤتریأن مانیلاریندا، تیرکش و غوشما سؤزلرده ، سؤزله مینگ یاسالشیندا و عمومان غوُشغی نینگ دوُلی مؤچبرینده سره دنیمیزده تـــأزه ومـــدرن بیر دیله دوشـــیاریس.تأزه سؤزلری اوللانماقدا غفور حوُجانینگ، اۆیتگه شیک سؤزلــــم لری حاییرلانماقـــــدا، قهار صوفی رادینگ غوُشغولارینا یۆزلنمک بوُلیار.
من بویرده بیر نأچه تأزه سؤز دؤزۆم لرینی میثال حؤکمۆنده گؤرکزه سیم گلیأر: آغزی بیرلیک رنگکی ـ غاپدال گؤرنۆشی ـ اینامینگ ایرانماز باشی ـ توُلقونا بای دنگیزلرـ يۆزلِرده كتِك لأن باسئق لئق، ایس دن پوُسـا آلماق ـ رأحیمدارلیق کؤچهسی ـ گؤزلرینگ هامراق آریغی ـ گؤزیتیمی دار پنجیره ـ دوُغولماجاق دۆنیا ـ چئپلاق سؤزلر ـ گۆنۆنگ کیرپیگی ـ گیجأنگ ابدیلیگی ـ چوُیون گیجأنگ زینجیری ، کؤپچۆلیگینگ آغراس آنگی ـ عؤمرۆنگ پروازی، غوُنارلاری ـ ارکینی اندیکلر ایه لأن یۆرک ـ گۆیزۆنگ یاپراقلارئنا بوُیالان سؤز. مدرن غوُشغودا مدرن سؤزلردن حاییرلانان غوُشغولاردان بیرمیثال:


اؤرأن ایر اکیلن میوه باغلارنا
منگزه دسیم گلیأر
دموکراسینی

گچمیشی آراسسا
سووارانلار کأن
امما بو توُپراقدا
اگلن پوداغی
شاغالا شام بوُلیار
یکأن ـ به یکأن.

بو گۆن اوُغلوم یوُلجاق بوُلیار آلمانی
انرژی سی یوُقاری
هم تاماسی کأن
امّا الی هیچ یتمه یأر نرسسأنگ!

اؤیۆمیزه میهمان گلن صوراتچی
آلمانگ اۆچ اؤلچه گین شکیل لندیریپ
روحونا سینگیأر
اوُنسوُنگ بیر کاغیذدا تصویرله ندیریپ
گأدیلن آلمانی
اوُغلوما بریأر.
( غ. خوُجا/ دموکراسی)

7 ـ غالیب گینگلیگی ـ غالیبسیزلیق
مدرن غوُشغینی غالیب بوُیونچا اۆچ توُپارا بؤلسه بوُلیار:
1ـ کلاسیک غالیپداغوشلان مدرن غوُشغی: بو توپاردا غوُشغینینگ دیلی، ماضمونی، تصویرلری و باشغا اله منتــلری مدرن بوُلسادا اؤنونگ غالیبی کلاسیک غالیبلارداندیر. غفورجوجانینگ کؤپ غوُشغولاری بوتوپارا دگیشلی دیر.
2ـ کلاسیک غالیبی دؤویأن مدرن غوُشغولار: بوتوپارا دگیشلی غوُشغولارا «گیجهلر» و «حارابا» کیتابلاریندا کؤپ غابات گلیأریس. اوُلاردا کلاسیک وزنلر دؤویلیأر. سطیرلر اوزینلی ، غیسغالی بوُلیار. یؤنه اوُلاری سینگه بارلاپ گؤرسنگ بللی بیر دؤزگۆنی کلاسیک آغراملاردان ساقلایارلار . میثال اؤچین:

اوُنسونگ
قالقیندیریپ روحومی
غانات یاساپ بارماقلارمینگ بوغنوندان
دوُغجاق یرینه چین دانگینگ
ینه بوُلدوم اوچوریم
باش اگدیلر یوُلومدا
ییغریپ داغلار آلقیمین
مانگا سالام بردیلر
اولی ـ اولی دنگیزلز پۆرکۆپ گؤگه تولقونین

( ا. بدخشان / حارابا کیتابیندان)
3ـ اوچۆنجی توُپار کلاسیک غالیپلارا اویمایان مدرن غوُشغولاردیر. بوتوپارا دگیشلی غوُشغولاردان قهارصوفی رادینگ کأبیر غوُشغولارینی هم ـ ده «اوچوش» کیتابیندان کؤپ غوُشغولاری میثال گتیرمک بوُلار. بو هیللی غوُشغولارینگ موسیقیسی غالیبا باغلانشیقلی بوُلمان باشغا المنت لر بیلن سازلاشیغا یتیأندیرلر.

8 ـ مدرن غوُشغی نینگ موسیقیسی
من کلاسیک غوُشغینی اوُقانیمدا بیر کانالینگ ایچینده غاییپ ایکی تاراپیمدا حاتارلانیپ دوران منگرش آغاچلارینگ گؤزل لیگنه سین ادیارین. یؤنه مدرن غوُشغینی طبیغاتینگ ایچیندن اؤز آیلاوـ آیلاو یوُلونی تاپیپ بیلن آقارا منگزه دهسیم گلیار. کنارینداقی آغاچلارام اولی لی ـ کیچی لی، یابــان توُقایینگ آغاچـــلارنینگ گؤزل لیگینی دویدوریار. آقارینگ آقشی هم کأ گۆیجیرگأب، کأ آراملانیپ باشغاچا لذّت بریأر.کلاسیک غوُشغی نینگ موسیقیسی شوُل بللی غالیپ لاردا غایتالانیانی اۆچین اوُندا غاراشیلمایان سازینگ سسینه، یا دویدانسیز باسیلیان نوُتالارا غابات گلمه یأرسینگ، یؤنه مدرن غوُشـــغی نینگ موسیقی سیندا سازینگ اینیم ـ چیقیمیندا، سؤزلرینگ باسیان پــــــرده لرینده کأماحال شیله بیر اۆیتگـــه شیک موقاملارا ساتاشیارسینگ ولین، موزیک سنی یر یۆزۆندن غوپاریپ، اوچوشا ماییل ادیأندیر. کلاسیک غوُشغولاری تۆرکمن حالق سازلارینا سالیپ آیدیم اتمک قین بوُلماز. یؤنه مدرن غوُشغینی آیدیم اتمک اۆچین یؤریته تأزه موقام، تأزه سمفونیا دؤرهتمه گمیز حؤکماندیر.
اینگ سوُنگقی آیتجاق زادیم، مدرن غوُشغی موسیقیسیز بوُلوپ بیلمز. اگر پوُازییادا موزیک بوُلماسا، اوُل ساداجا بیر ادبی تکست دیر ، اوُنگا شیغیر آدین بریپ بوُلماز.
گۆيزۆنگ ياپراقلارئنا بوُيالان سؤزلردن دۆزۆلن ـ
سِطيرلرينه چوُيونسانگ دييپ
بير غوُشغي يازدئم.

يازئنگ گۆل لريني أسگرمأن
گۆيزۆنگ گؤزه ل ليگيني اينكأر اده نينگ اۆچين ـ
غازانان گۆنألرينگدن يووونسانگ دييپ
بير غوُشغي يازدئم
سن
توُموس ائسسي‏سئني غارغادئنگ
گؤرمه دينگ گۆنه شينگ توُپراغا سئزيان مَهريني،
من
سؤزلرينگ مانگلاي دِريني سیر ئپ
پرده لردن دامان غانلاري دويوپ
يانگلادان آيدئملارئمدان
توُلغونسانگ دييپ
بير غوُشغي يازدئم

ييگيت سطيرلرمه،
غوچدورئپ غئزلي بندلريمينگ اينچه بيل‏لرين
ياشلئق آياق لاري
نأزيك اِل لري
دألي تن لري
تانس اتديرديم مِيداندا
غوُرقي سئغماز يالي
دۆنيأمه
اوُني سؤيگي بيلن دوُلدورئپ
مني
دويسانگ دييپ
بيرغوُشغي يازدئم.
( ا. بدخشان / شیغیر )
صفحه مناسب چاپ 
 
بی‌شک دیدگاه هر کس نشانه‌ی تفکر اوست، ما در برابر نظر دیگران مسئول نیستیم
فرستنده شاخه